講到「食字」這玩意，我以為香港傳媒已經高手雲集，估不到天外有天，另類高人原來在澳門，而且並非廣告或傳媒界，是來自飲食界的，早前去澳門，多得好友的介紹，終於來到新益美食，見識一位名叫肥仔俠的鬼馬「食字派掌門人」。
食店位於黑沙環住宅區，距離澳門舊城區，大約15至20分鐘的步行時間，好彩在Google有手，未算太難找的，唔熟路的，建議搭巴士去黑沙環望廈新村，或直接跟的士司機說肥仔俠新益。單看門面，新益只是一間街坊食店，但望望門口的招牌寫著「釣蟹雞煲」，似乎有啲嘢喎。進去店內，便更大開眼界，大量搞鬼菜名，一一盡顯眼前。
店主顯然熟讀香港娛樂文化，究竟什麼是夫唱婦隨、忘不了…你老母雞煲、千奇咪走雞、香+辣等於我、火+光等於鵝、荃家福綠壽、基本法一國兩製? 真係好考起!
答案在菜單內，這本菜單亦充滿廣東式幽默，令人不得不花時間慢慢欣賞。
咪以為店主只停留八、九十年代，他都頗為Update的，今年秋冬菜色就加了一道叫佔中魚人得利，食到香港政情。
所謂佔中魚人得利，就是一魚兩煮，一碟是清蒸魚腩和頭，中央放馬友咸魚尾，另一道則是魚尾骨滾湯，跟佔中有何關係? 都係為搞笑啫，何必咁認真呢!
至於基本法一國兩製，一國是葡國，用葡國菜方式，將咸魚分別用橄欖油浸煮，及咸魚炒蛋。
夫唱婦隨，夫是鴨，妻當然係雞，原來是油鴨滑雞臘味飯。
「光加熱等於火，火加歌等於我」這兩句耳熟能詳的歌詞, 當然是來自「激光中」，估唔到兩句歌都可以做到兩味菜!
第一味: 香+辣等於我，是澳葡式咖哩牛腩，個醬汁非常香濃，用麵包沾醬汁來吃，就十分正!
第二味: 食得最正的菜名，我認為是火+光等於鵝，其實是咸魚香炆醉鵝，是順德三水的煮法，首先炒香薑塊及調味，然後放已煮熟的鵝件一起炒，再落燒酒，便得到火加光的效果。
我有幸看到店主肥仔俠的獻技，一齊去片睇睇其中一些步驟!
這店另一招牌菜是健康吊針雞，將原隻清遠雞放在鋼鍋內煮熟，用類似吊鹽水的方式，將用米酒、藥材、蔬菜汁等調成的醬汁輸進鍋內，便成肉質鮮嫩的吊針雞。
食字掌門人不只有食力，也有實力，並非只係賣綽頭，菜色混合順德粵菜加澳葡風味，成為獨特的平民化澳門菜，烹調技巧有板有眼，亦見諗頭，令人看得開心又食得招積，你話低俗，我話麻甩就真，真係令人忘不了你老母，好期待肥仔俠未來的新創作。
新益美食
地址︰澳門望廈黑沙環斜路望廈新村第1座地下1B (Google地點)
電話︰+853 2848 1046
想知道我的最新動態，請關注我的Facebook專頁: YFL 生活博客
Instagram: kelvinyfl
