近排追緊HKTV嗰套話題劇《導火新聞線》，這劇太多精采對白了，句句入肉，其中最讓我入腦的一句，就是Alma(梁小冰飾演)開會時經常說的:「個故仔最緊要夠Juicy」，即「重口味」咁解。依家做新聞也好，做Blogger都好，寫嘢一定要夠爆夠Juicy，才能引起讀者注意。做飲食亦然，但怎樣的食店才夠Juicy呢? 第一，菜式要麻甩，口味要幾重得幾重；第二，環境要「引人入性」，最好隣近時鐘酒店。

這晚去吃飯的旺角粵來順，就符合以上兩個條件了，附近有聞名的地標式時鐘酒店外，隔離是馬會投注站，對面是某酒店集團旗下的Boutique Hotel，確實可以有好多想像空間的。但是，這晚飯局是全男班，好麻甩呀，唔通要我跟佢地去開房? Oh no! 太過份Juicy了，我接受唔到，還是乖乖地吃飯吧!

粵來順亦並非一般的街坊小店，大廚譚師傅上過電視，得過奬，而這店又跟東來順有些關係，聽落又真的幾誘人!

先來半隻豉油雞$98，以為平平無奇，一吃便知龍與鳳，豉油調得非常香甜濃豔，皮滑而肉質尚算嫩滑，雖然未至於是一等一靚雞，但功夫搭夠。

杏汁燉白肺$208，一片奶白的湯，滑滑脫脫似豬膏咁滑，杏仁味好香甜，如果再重一點甜一點，就更好。

我真的喜歡食湯渣的，以前跟家人吃飯，也一件不漏地清晒所有湯渣，就是鍾意煲完後殘留的清淡。

話梅豬手$98，這道菜是在場的豪哥指定必試的，話梅酸甜而不會搶去醬油的鮮味，兩者調得很恰當，豬手好滑而保持爽口。

黑椒脆豬肶$128， 繼續重口味，豬肶原隻炸好後上枱，先切開，然後才淋上黑椒汁。

黑椒豬肶或豬手似乎是麻甩酒家的必備菜色，各家有各家做法，這家亦有其特色，黑椒汁未算好重手，但勝在香甜和帶砂粒的質感，最宜用作撈飯。

金勾銀柳$88，粉絲、蝦子、瑤柱等材料一齊炒，郤沒有立立亂和硬綳綳的感覺，夠火喉，當然，汁料、水份和下材料的時間也要配合，這些都是功夫。

千絲芝心球$98，另一顯現功夫之作，看似是整團炒在一起，實則是每件非常分明，咬落蝦肉爽脆而中間有軟心芝味，層次感很高。

欖豉骨$78，將欖菜和排骨一起炒，很鬆化可口，亦有陣陣香料的濃味，而且腩排夠大份量，令人吃得滿足。

來一道啫啫鮑魚加豆卜，鮑魚偏向清甜而棄濃味，肉質爽口，這碟好快被清倉了。

糯米蒸蟹，有成廿両($440)，用籠仔是傳統的做法，亦保持風味，而蟹膏確實豐富，蟹肉亦算多，蟹黃跟糯米混和後，糯米吸收了蟹黃汁，每粒米變得很甜美，雖然此時已好飽，仍不得不添食多一點。

馬拉盞啫生菜 $68，重口味之後，都要些菜去清一清的!

最後還來甜品兩味，蛋花馬蹄露(左)和蛋白杏仁茶(右)，吃完才算完滿。

粵來順的菜色其實未算太過重口味，但麻甩得來又注重細節，我們八個人，這晚每人才二百多元，抵! 而酒家開到凌晨兩點，亦啱夜鬼和附近夜場的人客們，大可以成為宵夜熱點，或「事前和事後」的補充站，都係嗰句: 「夠Juicy!」

粵來順  

地址: 九龍旺角登打士街2-8號寶亨大廈地舖10-12號 

電話: (852) 2788 3078  

 

想知道我的最新動態，請關注我的Facebook專頁:  YFL 生活博客  

Instagram: kelvinyfl