【吃破世情】餐廳食物「CP值」和「性價比」?

(以下文章將收錄於小弟2019年5月發行的新書《吃破世情》內,敬請留意!)

相信睇慣中文食評的讀者們,都會經常見到食評家及傳媒用什麼CP值高、性價比高等字眼來形容菜單的價錢是否合理。看似好專業的字眼,其實是否有人會真的很認真地用計數機計出CP值,然後告訴你比率是多少,再總結一句:「真係好抵呀!」。好似無見過人這樣細心地計算,所謂CP值、性價比都是估出來的吧。

我亦用過類似的性價比和CP值字眼,那就無謂自打嘴巴了。但是,個人認為CP值、性價比等以後都是少用為妙,除非你自認計算得客觀又準確啦。

食物價錢平與貴這回事,雖然是因人而異,對我等低下層來說,香港所有每位港幣500元以上的套餐我都不會說很便宜,過千元的就更加難講出口。只要稍為去過外國旅遊就知,香港地食飯真的普遍貴,而且有些仲貴得好離譜。

貴價元凶

導致食物定價貴,租金是第一元凶,你個餐大部份的錢都去了交租,食店做得咁辛苦都是只是為業主服務。

第二大原因是服務質素,我明,我真係明,餐廳要做多兩轉客,無時間好好招呼你嘛,錯漏難免嘛,但是否真的要包容呢? 香港餐廳的侍應無笑容又是否正常? 還是我們習以為常吧。

如果真的要計CP值的話,服務、笑容、有無漏單和錯單等,又是否應該計埋落去呢?

你可以試試在食評網上寫餐廳服務態度差,然後給個劣評,我想你應該會得到兩個好極端的回應。網民最鍾意睇人PK,你寫得人地衰,實有人會和應。但另一方面,又會有人覺得你「懶巴霸,你估你係天王巨星,無嘢搵嘢來講」。

主觀定客觀?

講到底,食評人怕被人攻擊,餐廳又未必想聽真說話,只想你少罵當幫忙。我並非鼓勵大家投訴,只是想餐廳明白自己不足之處,否則,飲食界都只會淪為建制派一樣,香港怎會有進步。

再強調多一次,平或貴真的好主觀,但又貴又唔掂就並非主觀咁簡單,而是會令客人心靈受創,即係肉赤的同義詞。可惜,有些人就是過於自信,所以才會在技藝不高時先抬高個價,這就是好多餐廳的死因。


請關注Facebook專頁:  YFL 生活博客 

Instagram: kelvinyfl

YouTube: Kelvin Leung

廣告

新增回應