【吃破世情】只飲白酒的人 (挑戰配酒常規)!

(以下文章將收錄於小弟2019年5月發行的新書《吃破世情》內,敬請留意!)

近年經常去大大小小的酒會,也出席過一些 Wine and food pairing( 配酒晚餐 ),算是見識過不同類別的酒如何跟食物搭配。可惜我這個人記性差,好多時都搞不清邊個酒莊、邊個年份、幾多個味覺層次之類的事,於是,我揀酒通常都是憑直覺去判斷的。

有時也會聽聽專業配酒師點樣講他們的配酒心得!

以前有些專業人仕常說,最簡單的葡萄酒跟食物配搭準則,就是吃白肉配白酒,紅肉配紅酒。不過,很多時都要睇埋烹煮方法,以及用的醬汁才可確定。

打破既有原則

飲酒既不能一本通書睇到老,亦要加點叛逆性格。身邊就有不只一位朋友從來只喜愛白酒,無論吃什麼都要選白而棄紅,就算吃牛扒都會選擇白酒。你可以說他們唔識食,但他們偏偏就是鍾意這樣配。味道唔夾? 他自己覺得夾就得咯。

有時在配酒宴上會遇見到一些“Think outside the box”的配酒師,他們偏偏不喜歡循規蹈矩,硬是要配出新花樣。雖然配出來的效果未必人人認同,但我會由衷地欣賞他們的勇氣。

沒有標準公式

食物配葡萄酒,其實跟愛情一樣,沒有標準的公式,高矮肥瘦、男男女女、年紀大或細,只要你鍾意都得。

記住,千萬不要因為別人說不合襯而轉為選擇別人心目中的公式。感覺是好個人的,自己試過覺得好食好飲,就可以因應自己的喜好而繼續去做吧。人一生物一世,何必要理別人點睇呢。

我個人就紅白酒都啱,吃牛扒仍偏向飲紅酒比較多,但同時亦不屑那種既定的配搭方式,所以好欣賞一些對自己喜好抱堅定態度的人。

如果你是一個只飲白酒的人,下次如果在扒房碰見我時,記住不要遷就我,一齊乾一杯吧。


請關注Facebook專頁:  YFL 生活博客 

Instagram: kelvinyfl 

YouTube: Kelvin Leung

 

廣告

新增回應