【長沙灣】不在太子站的太子海鮮菜館 – 平民海鮮燒味食堂!

最初路經這間「太子海鮮菜館」是因為搭青山道小巴而在此總站落車,不禁疑問,點解明明在長沙灣郤說是太子? 查實只是名字啫,又何必咁認真,太子大廈都不在太子站啦。

講起這間太子海鮮菜館,每到晚飯時間,都會見到很多人在門外排隊買外賣。作為街坊,我自己除了買過兩餸飯外,間中在此吃叉燒飯,但吃海鮮和小炒都是首次。

這店老闆文偉龍師傅曾是TVB電視節目《大廚出馬》其中一位得奬廚師,他亦曾在中菜酒樓擔任總廚,來頭不少。

位於長沙灣區的店,自然都有不少街坊客,夜晚好多時會見到一家大小成圍枱咁來食飯的。

睇睇菜單,既有燒味又有小炒,當然不乏時價計算的海鮮。

燒味方面,我食過其叉燒和燒鵝,都同樣好有水準。

「太子叉燒皇」

識食的一定要食燶燶地邊的叉燒,而且要肥瘦適中,外觀要有油光,咬落有軟腍質感,這裡的叉燒就好貼近以上幾點,都有細個時食叉燒那種風味。

「至尊燒鵝皇」

雖然外表看來不夠光澤,但當吃一口時,便發現皮脆得驚喜,鵝肉得肥厚而爽滑,只是差一點鵝油便成完美的燒鵝。

「脆皮炸豬手」

食炸豬手,除了去德國餐廳外,我亦想起鄰近這店的大中華黑椒豬手,「太子」的反而較近似德國那種,要吃到脆皮的話,就要在端上不久時快食,攤涼了就唔脆,這是好正常的事。此時,如果叫一杯啤酒就更Perfect了。

「胡椒焗海中蝦」

當未端上枱時,一陣陣胡椒味已經飄到來,開蓋時,胡椒味還未散去,原來煲內真的落了頗多胡椒。但又不用擔心,其實只是香口惹味,又至於很辣的地步,除了胡椒香外,這煲蝦的殼是估不到的香脆,那種脆就好比食薯片那種脆,一定要連殼食。

「避風塘肉蟹」

十月是蟹季,此時的蟹是最大最厚肉的,這煲蟹亦不例外,單是蟹鉗已是像雞膇咁大隻,而且蒜粒份量足,炒得尚算惹味而豐富,但我認為可以更辣一點。

個人很鍾意這類街坊小炒店,估不到這裡的海鮮咁有水準,有大酒樓的風格,但又不失街坊食堂風味,值得叫埋成班人湊夠一圍枱來大吃海鮮。

 

太子海鮮菜館

地址: 長沙灣元州街481-483號地下

電話: (852) 27433348 / 27433384

營業時間: 11:00 – 00:00


請多多關注Facebook專頁:  YFL 生活博客 

一齊講飲講食講旅遊 Facebook群組: 生活博客吃喝玩樂

Instagram: kelvinyfl

YouTube: Kelvin Leung

廣告

新增回應