傳媒要寫2021年大事回顧其實並不難，大可以抄返去年的新聞，稍作更改就可以。2021年跟2020年同樣都是在疫情下，一樣要戴口罩出街，一樣有限聚令，一樣冇得飛，一樣有Mirror，一樣有國安法，一樣有安心出行，今年仲一定要掃，仲要加針㖭。而我都打咗兩針，跟去年一樣大部份時間Work from home，兩年來在生活上好像沒有多大分別似的，但實際上，我就過了像坐過山車般的一年。
走先啦係咁先啦
這兩年香港好多人離開，今年尤其特別多人走，有些會在臨離別前在機場打卡，有些則在到埗後才告知大家，亦有些人靜悄悄地走，不留一點痕跡。
移居外國的人固然多，亦有人移民去天國，打開自己的Facebook，每年都總有幾個認識的人忽然間走咗，連每日追蹤開的傳媒都可以一下子消失，告別式只能留在網上，在新時代下，我們都要習慣下隨時要打「RIP」、「願平安」等等字句。
留下只有思念，唯有期望若干年後會在某地方相見。留低的，就算在同一地方，又是否會常相見呢? 這兩年世界的大轉變令我領悟到，朋友都是隨緣好了，人生苦短，時間最好留給值得共對相處的人，意見和興趣都不合的話，就不要浪費時間了。
講完世情，講講自己。
今年由Work from home的狀態再提升至自由工作人，以後夜晚約我食飯時，不必再問是否啱啱放工，對於自由人來說，工作時間是冇定的。以往會覺得這個斜槓族身份欠缺了點安全感，但自從去年一波未停一波又起的疫情後，原本那份全職工作都失去了所謂安全網，就不如索性跳出舒適圈，做自己喜歡的事，說不定會創出另一片天空。
自由真好，但自由原來都要有限制的，至少出到街就要遵守交通規則，否則就大檸樂了!
Andy Warhol講過，每個人都能成名15分鐘。今年9月，我就一時大意，失驚無神地跑出馬路，咁就俾車撞倒斷咗腳骨，即時送往醫院急救。我當日在網上被封為#長沙灣跑步男，一時間成為網絡上的無名新聞主角，據說連大台夜晚的電視節目都有報導。
左思右想，這個教訓確實是慘痛的，都是自己衰大意囉，有錯是要認的，要對自己負責任嘛。我都看過網上關於這次意外的報導和影片，亦好奇地查看了網民的留言，不乏尖酸刻薄的，郤沒有令我唔開心，反而覺得有些留言都幾好笑喎。今年總算做過一日半日的新聞人物，紅過15分鐘呀。懂得自嘲是件好事，頓覺自己的意志又再強了許多。
最緊要人冇事，我的身體已在康復中，隻腳都逐漸慢慢行得返，但仍需要多一段時間才完全康復。好彩執得返條命仔，幸運地成為留下在這世上的人，証明個天都想我留低，往後就要好好活下去。經歷重創之後，現階段休養中的生活變得簡單了許多，當基本生存成為最重要的大事，什麼物質享受都可以暫時拋開，此刻只想簡單地好好過日子，要活得快樂其實可以好簡單。
你今年有否好好過生活?
香港娛樂圈近兩年新人輩出，好多年沒有這樣熱鬧過，香港人的生活好似回到八十年代那樣，每日追下星，談論下明星八卦新聞，睇下人哋的IG Story，上YouTube睇片，不談政治，只談風月，咁就一日復一日，今年時間好像過得特別快，咁樣都幾好呀，你覺得咁樣開心嗎?
今年的香港樂壇推出咗好多歌，如要投一首Song of the year，我毫不猶豫地揀C AllStar的「留下來的人」，歌詞可以有好多種解讀，既講到移民，又可比喻生死，更可帶到連串社會事件。總之「留低與重生的，郤在這邊，只可接受新生活的蛻變」，雖然有點無奈，但只要抱著樂觀的心態，無論世界變得幾壞，你的心態不必受到影響，都可以過得很幸福的。
最後飛叔提提你，要小心過馬路呀!
請關注飛叔平台:
Facebook專頁: 飛叔生活 Kelvin Leung
Instagram: kelvinyfl
YouTube: 飛叔Kelvin Leung
