對於在香港長大的人，我們習慣了十一月就看到商場聖誕燈飾，年年都感受到聖誕節帶來的濃郁歡欣氣氛。當我還在少年時，確實很期待過聖誕，人越大，越沒有那麼重視節日了。近年聖誕節都沒有特別大肆慶祝，過去兩年因疫情關係更加不在話下，去年聖誕就靜靜地在家過聖誕，但又一樣快樂喎。其實點樣過聖誕都好，只不過想快樂啫，每人都有自己一套過聖誕的方式，我就認為如果做到以下七件事，聖誕就算不感覺狂歡，應該會很療癒的，這都是我的願望清單。
一: 佈置屋企
家父很重視聖誕節，記得小時候跟父母同住時，每年到了十二月初，父親已急不及待地佈置屋企。我家都算幾環保，聖誕裝飾收藏得很多，可以重用多年，其實那些裝飾並不奢侈，通常都只是一棵約一米多一點高的塑膠聖誕樹，加幾條金光閃閃的「Merry Christmas」、「Happy New Year」彩帶，再加幾條閃令令的彩繩，掛在天花上及窗邊，掛到成間屋都係，後來到了中學階段，開始覺得有點俗氣，叫老豆放少一些飾品，現在回想起來，反而很懷念，那種「俗氣」聖誕佈置現在就只有長留在心中。
相信很多香港人屋企都擺唔落大棵聖誕樹，但大有大擺，細有細擺，我現時屋企跟大家一樣都不大，郤都堅持擺棵細細地的聖誕樹，並會掛著LED燈串，看著夜晚閃著燈的聖誕樹，真的好療癒呀。
二: 播聖誕歌
都是受家人的影響，小時候除了十二月初就佈置聖誕裝飾外，同時亦狂播放著聖誕歌的Cassette帶，令我從小對聖誕歌滾瓜爛熟，但又唔覺得嫌惡。我真係好鍾意聽聖誕歌的，是真正傳統那批聖誕歌，例如O Come, All Ye Faithful, White Christmas那些，而不是近幾十年聽到悶的Last Christmas和有N個版本的All I Want for Christmas is You。
三: 聖誕要有火
睇得西片多，冬天屋子都有個壁爐，聖誕氣氛應該會濃厚好多的，但香港又唔會落雪，加上住大廈，怎可能會有個燒柴火爐呢?
但香港人的聖誕節其中「兩寶」郤是跟火有關，就是BBQ和打邊爐，其實香港人在中秋和過年都係做呢兩味，但聖誕節戴著聖誕帽，燒下嘢食或打下邊爐又確實係幾開心的。
去年因限聚而冇得出外BBQ，除了只可以在家滾一滾外，我就在電視長開著個YouTube壁爐影片，當自己屋企有個火爐，過一個「沉浸式」火紅聖誕。
四: 老派聖誕大餐之必要
細個時真的好鍾意食聖誕大餐的，那時每逢聖誕前夕，父母會帶我們去灣仔的西餐廳食大餐，去得最多的是波士頓餐廳，其次是紅屋，那個年代的聖誕大餐有八至十道菜，最後有件禮物仔送的，其實食物只是好普通，但已經逗得我好開心了。
現時雖然都覺得聖誕餐又貴又唔抵，有時候還會避免聖誕食西餐，覺得食其他菜會便宜一點，可能太耐冇過真正的聖誕節了，今年覺得要吃一次聖誕餐，有種老派聖誕的儀式感，就算明知被掠水，我都心甘情願的。
五: 看套聖誕電影
農曆新年有賀歲片，聖誕節都要看部聖誕電影才算過節。經典的聖誕題材電影之中，《Love Actually》不知睇過幾多遍，但間中還會心思思攞出來再看一遍，聖誕電影通常未看已估到結局，九成十是大團圓結局，觀眾大抵都只不過想願望成真罷了。
不過，個人的心水聖誕電影還有一套，就是《戰場上的快樂聖誕》（Merry Christmas, Mr. Lawrence），這部電影就例外地不是完滿收場，但確實是經典中的經典。
六: 寄聖誕卡
對於我這類大叔來說，寄聖誕卡是一種情懷，記得年少時，會專登走去書局挑選聖誕卡，我會偏向挑每位同學仔都不同款，聖誕卡上未必會寫很多字，但因為重視寄出的過程，寄卡其實仲開心過收卡。電腦盛行的90年代後期，不少人開始改為寄e-card，其實跟宣傳電郵冇分別，好多時收到都馬上刪除。再到了近年的社交媒體年代，連e-card都慳返，只在WhatsApp或其他Social Media傳個貼圖都當祝賀了。時代變了，唯有跟隨去轉變，只是希望傳送Sticker時是出於真心，而非隨便轉發就好了。
我仍期待收聖誕卡，如果有朋友同樣想收到聖誕卡的話，不如我地交換好嗎?
七: 送聖誕禮物
在聖誕派對上交換禮物這玩意，相信大家都知是玩玩性質，不必認真的，唔通你會期望在公司派對收到合意的禮物咩，唔係收搞鬼嘢，你都當執到啦。其實聖誕節最應該送份禮物給自己，如果你心目中有樣東西想收的，與其等人送，或者迫另一半送，不如自己買送給自己啦，你自己才是這世界最重要的人，藉著聖誕佳節，好好孝敬自己吧!
祝大家有個療癒的聖誕節!
請關注飛叔平台:
Facebook專頁: 飛叔生活 Kelvin Leung
Instagram: kelvinyfl
YouTube: 飛叔Kelvin Leung
請支持個人自媒體運作，課金少少無拘，多謝!
一按即 PayMe！
https://payme.hsbc/kelvinyfl
- 【北角美食】法日式精緻Fine dining @Le Bec Fin
- 【大阪美食】心齋橋高質的燒鳥 @炭火燒鳥清
- 【京都】在妙心寺方丈面前學坐禪
- 【銅鑼灣Omakase】堅的青云Senn，飲飽食醉的壽司清酒宴
- 【京都美食】京都三間人氣拉麵店推介
